Psalms 105

1Bongani uJehova, memezani ibizo lakhe; yenzani kwaziwe phakathi kwezizwe lokho akwenzileyo.

2Hlabelelani kuye, hlabelelani indumiso kuye; khulumani ngazo zonke izenzo zakhe ezimangalisayo.

3Thokozani egameni lakhe elingcwele; akuthi izinhliziyo zabamdingayo uJehova zithokoze.

4Khangelani kuJehova lasemandleni akhe; funani ubuso bakhe kokuphela.

5Khumbulani izimangaliso asazenzayo, imimangaliso yakhe, lezahlulelo azikhuphayo,

6We zizukulwane zika-Abhrahama inceku yakhe, we madodana kaJakhobe, abakhethiweyo bakhe.

7UnguJehova uNkulunkulu wethu; izahlulelo zakhe zisemhlabeni wonke.

8Uyasikhumbula isivumelwano sakhe nini lanini, ilizwi lomlayo wakhe, okwezizukulwane ezizinkulungwane,

9isivumelwano asenza lo-Abhrahama, isifungo asifungayo ku-Isaka.

10Wakuqinisa lokhu kuJakhobe kwaba yisimiso ku-Israyeli njengesivumelwano saphakade:

11“Ngizalinika ilizwe laseKhenani njengesabelo selifa lenu.”

12Kwathi besesebalutshwana, bebalutshwana kakhulu, beyizihambi kulo,

13bazulazula kulesi lalesiyana isizwe, basuke kulo umbuso baye kuloyana.

14Kavumelanga loba ngubani ukubacindezela; wawakhuza amakhosi ngenxa yabo:

15“Lingabathinti abagcotshiweyo bami; lingahlukuluzi abaphrofethi bami.”

16Waletha indlala elizweni wachitha zonke iziphala zokudla;

17wathumela indoda yabandulela – uJosefa owathengiswa waba yisigqili.

18Bambhonxula izinyawo zakhe ngezibopho, wabotshwa intamo ngezinsimbi,

19kwaze kwathi lokho ayekutsho ngaphambili kwagcwaliseka, kwaze kwathi ilizwi likaJehova latshengisa ukuthi wayeqinisile.

20Inkosi yathumela ukuthi akhululwe, umbusi wezizwe wamkhulula.

21Wamenza umbusi wendlu yakhe, umbusi wakho konke okwakungokwakhe,

22ukuqondisa amakhosana akhe njengokubona kwakhe afundise izingwevu zayo ukuhlakanipha.

23Kwathi-ke u-Israyeli wayangena eGibhithe; uJakhobe wahlala njengowezizweni elizweni likaHamu.

24UJehova wenza abantu bakhe banda kakhulu; wabenza baba banengi kakhulu bandela izitha zabo,

25kwathi izinhliziyo zabo wazenza zazonda abantu bakhe, bakha amacebo amabi ngezinceku zakhe.

26Wathuma uMosi inceku yakhe, lo-Aroni ayebakhethile.

27Benza iziboniso zakhe ezimangalisayo phakathi kwabo, izimanga zakhe elizweni likaHamu.

28Wathumela umnyama wenza ilizwe laba mnyama – kanti angithi babewahlamukile amazwi akhe?

29Waguqula amanzi abo aba ligazi, okwenza izinhlanzi zawo zafa.

30Ilizwe labo lanyakazela ngamaxoxo, angena ezindlini zokulala ezababusi babo.

31Wakhuluma, kwavela umtshitshi wezibawu, lezinswintila elizweni labo lonke.

32Wenza izulu labo laba yisiqhotho, laba lombane elizweni labo lonke;

33wacakazela phansi amavini abo lemikhiwa, waphundla izihlahla zelizwe labo.

34Wakhuluma zatheleka izintethe, izintethe ezingelakubalwa;

35zadla yonke into eluhlaza elizweni labo, zadla izithelo zomhlabathi wabo.

36Ngemva kwalokho wasebulala amazibulo wonke elizweni labo, izithelo zokuqala zobulisa babo.

37Wamkhupha u-Israyeli, ethwele esisitheka isiliva legolide, kakwaba lamunye phakathi kwezizwana zabo owehlulwa yikufa.

38IGibhithe yathokoza ngokusuka kwabo, ngoba base bemesaba kubi u-Israyeli.

39Wendlala iyezi lagubuzela, lomlilo ukukhanyisa ebusuku.

40Bacela wabalethela izagwaca, wabasuthisa ngesinkwa sasezulwini.

41Wavula ilitshe amanzi antshaza; njengomfula ageleza enkangala.

42Ngokuba wakhumbula isithembiso sakhe esingcwele esaphiwa inceku yakhe u-Abhrahama.

43Wabakhupha abantu bakhe ngokuthokoza, abakhethiweyo bakhe ngenhlokomo yentokozo;

44wabapha amazwe ezizwe, badla ilifa lalokho okwakuginqelwe ngabanye.

45ukuze bagcine iziqondiso zakhe balalele imithetho yakhe. Dumisani uJehova.